24 DE FEBREIRO: ANIVERSARIO DO NACEMENTO DE ROSALÍA DE CASTRO

Coñece un pouco máis a Rosalía de Castro, unha figura emblemática na historia da Literatura Galega.

Negra Sombra, poema incluído na obra Follas Novas (1880), logo de ser musicada por Xoán Montes convertiuse nunha das cancións galegas máis fermosas. A súa estrea foi na Habana no 1892.

 

A REBOLIÑA PREGUNTA...

Quen me sabe dicir algo sobre esta foto?

Que é...

Onde...

Cando...

Que se celebra...

XA CHEGA...POR FIN...O ENTROIDO!!!

"Días nos que está permitido o que non o está no resto do ano...

en que se poden facer cousas que noutro tempo parecerían moi mal,

serían faltas graves contra da boa crianza e aínda contra as mesmas leis…

O entroido presenta certo aspecto de "o mundo ao revés"
 

Vicente Risco

Peliqueiros de Laza

O Entroido é unha festa moi popular en Galicia, e máis nas nosas vilas e aldeas, aínda que durante os anos do franquismo, coa prohibición das máscaras, esmoreceu un pouco.

A orixe da palabra "Entroido" ou "Antroido" deriva do latín introitus , que significa ‘entrada’ ou ‘comezo’ da primavera e do rexurdimento da vexetación.

E OUTRO REFRÁN...(Este sobre comida e, como non, do porco, que é o rei culinario deste tempo!)

O labrego galego, en Carnavales
come lacón para esquecer seus males;
e en bailes e foliadas
dixíreo despois a bofetadas.
Por iso os lacóns
non producen xamais indixestións.

TEATRO

Logo de moitas voltas, parece ser que xa temos a obra e os protagonistas: Mamasiña que medo, de Chus Pereiro.

Como o grupo inda non ten nome, agardo as vosas aportacións no meu rebolibuzón, e logo elixiremos a máis votada.

TARDE DE DOMINGO

Normalmente non me gustan moito as tardes de domingo, e menos no inverno...
Pero hoxe é un domingo especial, porque teño visita: un xastre que vive ao outro lado do embalse que me conta unha chea de historias e me ten atontada escoitándoo.

Hoxe vai de refráns, que ultimamente xa sabedes o moito que me interesan...

SE DÍA DE CANDELAS NON CHOVE
NIN FAI VENTO

"MITÁ" DO INVERNO FÓRA
 E "MITÁ" DENTRO

Festa da Candelaria: tamén chamada festa da Luz, celébrase o día 2 de febreiro. Acéndense velas ou candeas, de aí deriva o nome.

O día 2 de Febreiro é coñecido na cultura popular galega, ademais de pola mencionada festividade da Candelaria, por ser o casamento dos paxariños.

En Estados Unidos nesta mesma data celébrase o Día da Marmota, día no que este animal durmiñón esperta logo do longo periodo de hibernación.

FEBREIRO

Hoxe erguínme refraneira...a ver se sodes quen de aprendelo!!

Febreiriño curto,

cos teus días vinte e oito;

se duras máis catro,

non queda can nin gato,

nin ratiño no burato,

nin ovella rabela,

nin pastor para ir con ela,

nin cornos ó carneiro,

nin orellas ó pregoeiro.

Hai moitísimos refráns, segundo a zona na que vivamos, referidos aos meses.

Pregúntalle aos teus avós, que son os que máis saben destas cousas, e cóntanos algún.